السبت , 20 يوليو 2019

يوم بيوم

 

رحاب صبري بنت هاشم تكتب

يوم بيوم..
خليك كدة في الدنيا عايش
يوم.. بيوم
وبلاش تحوش في الهموم
اضحك لها…
خلص معاها ف وقتها
واديها ضهرك تاني يوم
****************
وف كل يوم…
حبل الامل خليه يلف
علي كل شجرة في سكتك
اعمل مسار…
اليأس…… عار
****************
خفيف خفيف…. عامل همومك
و ف كل ليلة تم يومك..
بالشكر للي عداه عليك
فيه ايه في ايديك؟؟
الدنيا ماشية… ليك.. عليك
مش فارقة خااااالص للجميع
الفرق.. ليك
فبلاش تاخدها علي صدرك قوي
هون عليك.. وخليك قوي
**********************

الف وش…
في كل يوم اتنين تلاتة هتقابلهم
بألف وش
هون عليك ومتتصدمش
انت الجبل
في وشك الواحد ألم… علي كل وش
صدقك كرابيج بتلسع كدبهم
من كترهم.. اوعاك تكش
*******************
واهو يوم بيوم
خوض معاركك.. يوم بيوم
داوي جرحك يوم بيوم…
وابدأ نضيف….
الصبح يجي عليك….. يلاقيك لطيف
وخفيف خفيف…
*********************
قابل نفاقهم بابتسامة سخرية
مفهومة منك….
اصل انت وشك…. شفاف قوي
حكم القوي…
انك تكون انت القوي
ف توقيت سخيييف
حكم القوي..
انك تكون……حتة أصلي في زمان الزيف
#رحاب_صبري
#بنت_هاشم

شاهد أيضاً

ضبط إثنين من العناصر القائمة على تسفير راغبى الهجرة غير الشرعية

ضبط إثنين من العناصر القائمة على تسفير راغبى الهجرة غير الشرعية